Soli-koncert we wuchodosakskim městačku z hudźbnikami, kotřiž su ze serbskim swětom kaž tež skerje lěwicarskej subkulturu zwjazani. Solidarita za iniciatiwu z narokom, Serbstwu bóle demokratisku legitimaciju wutworić, hač to struktura towarstwa zamóže. Najebać mnohe problemy, tónle proces organizować, wěcka to, za kotruž rady solidarisce hrajemy. Što měło so tež wulce nimokulić na wulkotnym wječoru w rjanej Běłej Wodźe, kotryž cyle rozdźělnych ludźi na rejwanišćo a do rozmołwy wjedźe?
Čert a hela!
Njedawno čitajo Serbske Nowiny dyrbjachmy zwěsćić, zo nastupi nastupajo wólby Wětošowskeje gmejnskeje rady zastupjer Serbskeho sejma w Delnjej Łužicy za němsko-nacionalistisku, podźělnje fašistisku stronu. To da nam najprjedy raz słowa na jazyku wjaznyć. Kak drač móžeš tajke něšto činić a runočasnje chcyć mjeńšinu zastupować, kotrejež nazhonjenja z němskim nacionalizmom su wšo druhe hač zwjeselace? Generacije na wjesnych šulach z němsko-narodnymi wučerjemi za nałožowanje swojeje maćeršćiny chłostanych dźěći za sebje rěča.
A wot toho wothladajo: Tale tak mjenowana alternatiwa zwjazuje na nanajbóle njesympatiske wašnje rasizm a neoliberalizm, šćuwańcu přećiwo chudym a pseudosocialnu retoriku. Zapadoněmskej Höcke a Gauland rěčitaj wo “změnje 2.0”, a nichtó so jimaj njewusměje. Najebać sylny impuls tomu z cynizmom znapřećiwić so wjeselimy, zo je so naposledk tójšto ludźi we wšej swojej wjelorakosći zešło, kotřiž čłowjeka zacpěwace plany tuteje strony raznje wotpokazuja, samo w Budyšinje.
A nětko?
Serbski sejm je hišće poměrnje mała iniciatiwa. To rěka tež, zo ma jednotliwe měnjenje, kaž „priwatne“ tež było, wěstu wahu. To zaso woznamjenja, zo njemóžemy jako hudźbnicy, kotřiž soli-koncert hraja resp. organizuja, prosće na jewišćo stupić a potom hubu dźeržeć. Dyrbimy so pozicioněrować. Po swójskim rozmyslowanju kaž tež po měnjenju wjacorych ludźi, z kotrymiž smy so rozmołwjeli, by wězo najjednoriša kročel była, wustup prosće wotprajić. Lěpšina toho: Móhli so słónčić w jasnosći a jednozmyslnosći a dalšich diskusijow so wzdawać. By pak tež njelěpšiny měło: Bychmy jednotliwej wosobje móc spožčeli, kajkaž jeje woznamej hewak w žaneježkuli měrje njewotpowěduje. Bychmy wšěm kołowokoło Serbskeho sejma, kotrychž sej wažimy a kotřiž so z wulkej prócu za wažne wěcy angažuja, do chribjeta padnyli. Last but not least bychmy diskusijny rum zawrěli, w kotrymž so wšitke narěčane naležnosće zjawnje wobjednawaja, a to do zakónčenja diskusije.
Smy měnjenja, zo njelěpšiny njewotprajić koncert naposledk přewahuja. Město toho chcemy wustup wužiwać, so wospjet jasnje a zjawnje pozicioněrować. Nimo toho so nadźijamy, zo so mnozy na za Serbski sejm zasadźuja, jón sylnjenja a jeho wuwiće aktiwnje sobu postajeja. Koncert 11. meje je składnosć tomu. Pójće do Běłeje Wody, rejujće a diskutujće z nami.
Wočińće woči! Nacionalizm njeje alternatiwa! Móhło tak rjenje być…
Jacke Schwarz a Paul Geigerzähler
6. 5. 2024
